घरमा आगो लाग्दा अढाई वर्षीया बालिकाको मृत्यु, आमाबाबु घाइते

भोजपुरको षडानन्द नगरपालिकास्थित एक घरमा आगो लाग्दा अढाई वर्षीया एक बालिकाको मृत्यु भएको छ। आगोमा परेर बालिकाका आमा–बुवा घाइते भएका छन्।

षडानन्दस्थित बोया बिहीबारे बजार आगलागी हुँदा स्थानीय खेममणि तामाङकी साढे २ वर्षीया छोरी रेश्मा तामाङको मृत्यु भएको जिल्ला प्रहरी कार्यालय भोजपुरले जनाएको छ।

जिल्ला प्रहरी कार्यालयका डीएसपी राजकुमार राईका अनुसार आगलागीमा परेर खेममणि र उनकी श्रीमती मिना तामाङ गम्भीर घाइते भएका छन्।

उनीहरुलाई उपचारका लागि वीपी कोइराला स्वास्थ्य विज्ञान प्रतिष्ठान धरान लगिएको छ।

खेममणि तामाङको पसलबाट सुरु भएको आगलागीबाट चार घर जलेर नष्ट भएका छन्। आगलागीबाट खेममणिको पसलसहितको घर जलेर नष्ट भएको छ।

त्यसैगरी स्थानीय डम्बर तामाङको २ वटा घर, हरि गोलेको किराना पसल, अर्जुन तामाङको घर तथा होटल र सूर्य तामाङको कपडा पसल र टेलर्स समेत जलेर नष्ट भएको डीएसपी राईले जानकारी दिए।

आगलागीको कारण खुलेको छैन। आगलागीबाट करोडौंको क्षति भएको अनुमान गरिएको छ।

Leave a comment

Your email address will not be published.