म बाट ठूलो गल्ती भयोः केपी ओली

काठमाडौं । पूर्वप्रधानमन्त्री तथा एमाले अध्यक्ष केपी ओलीले आफूबाट ठूलो गल्ती भएको स्वीकार गरेका छन् । अध्यक्ष ओली सितिबिती आत्मआलोचना गर्दैनन् । अरुमाथि तिखो प्रहार गर्न खप्पिस ओलीले आफ्नो गल्ती स्वीकार्दैनन् तर धेरैपछि ओलीले आफूबाट कमजोरी भएको कुरा सार्वजनिक रुपमै स्वीकारेछन् । ओलीको स्वीकारोक्तीपछि नेताकार्यकर्ताले खुसी व्यक्त गरेका छन् । आफ्ना कारण राजनीतिक दल र अरु नेताहरूको कमजोरीका कारण जनतामा पार्टीप्रति वितृष्णा बढेको स्वीकार गरेका हुन् ।

‘मैले नेपाल कम्युनिस्ट पार्टीलाई फुट्नबाट जोगाउन सकिनँ, नेतृत्वमा रहेको व्यक्तिका रूपमा यस सम्बन्धमा मबाट पनि कमजोरी भयो होला’ आफूलाई त्रुटिविहीन मानवका रूपमा प्रस्तुत गर्ने र कमजोरी स्वीकार नगर्ने नेताका रूपमा चिनिएका अध्यक्ष ओलीले भने– ‘असल नियतले काम गर्दागर्दै, विशाल र एकीकृत नेकपा बनाउने सफलता हासिल गर्दागर्दै पनि त्यो एकता जोगाउन नसकेको म स्वीकार गर्छु ।’ एमालेकै केन्द्रीय प्रचार तथा प्रकाशन विभागले सोमबार राजधानीमा आयोजना गरेको सम्पादकहरूसँगको अन्तरक्रियामा ओलीले सम्भवतः पहिलोपटक आफ्नो भागको कमजोरी स्वीकार गरेका थिए ।

उनले दलहरूप्रति जनतामा वितृष्णा बढेको स्वीकार मात्र गर्नुभएन, यसको कारण चिरफार गर्ने प्रयास पनि गरे, ‘दलहरूप्रति वितृष्णा फैलाउने काम आजको गठबन्धन सरकार र यसमा रहेका पार्टीहरूले सर्वाधिक गरेका छन्, यत्रतत्र भ्रष्टाचार छ, महँगी बढेको छ, जनताको ढाड सेक्ने काम भएको छ, अनाडीहरूले गलत पात्रको प्रवेश गराएर बजेट बनाएको र एकपछि अर्को देशघाती काम गरेका कारण दलहरूप्रति वितृष्णा बढ्ने नै भयो ।’

अध्यक्ष ओलीले केही दल र नेताहरूको कमजोरीका कारण पार्टीप्रति वितृष्णा बढे पनि यसको विकल्प नरहेको, लोकतान्त्रिक शासन व्यवस्थाको ठाउँमा अर्को व्यवस्था आउन नसक्ने धारणा राखे, ‘अपवाद जहाँ पनि हुन्छ, पाणिनीको व्याकरणमा त अपवाद छ, दलको विरोध त्यस्तै एक अपवाद हो ।’‘हामी संघीय र प्रादेशिक निर्वाचनको संघारमा छौं’ भन्ने वाक्यबाट शुरू भएको अध्यक्ष ओलीको सम्बोधन आगामी मंसिर २ गते हुने भनिएको संघीय र प्रादेशिक निर्वाचनको प्रचारको प्रारम्भ हो । उनले निर्वाचनको एजेन्डा ‘समृद्ध नेपाल र सुखी नेपालीको नारा सफल बनाउन शासनमा स्थिरता र स्थायित्व’ हुने जानकारी पनि गराए ।

उनले भने, ‘राजनीति दुई ध्रुवमा बाँडियो, त्यो ठीक छ, एकातिर प्रष्ट दिशा र लक्ष्य लिएको एमाले छ भने अर्कातिर पाँच विचार बोकेका पाँच दल छन्, उनीहरूको लक्ष्य राष्ट्र र नागरिक होइन, जसरी पनि गठबन्धन जोगाउने र सत्तामा टाँसिएर बस्ने छ, हामी यही विचार लिएर जनतामा जान्छौं ।’अर्को एक प्रसंगमा अध्यक्ष ओलीले प्रश्न गर्नुभयो, ‘विदेशी डलरको सञ्चितिका तीव्र मन्दी आएका बेला नेपाललाई हतियार किन चाहियो ? यस्तै बुद्धिले गठबन्धन सरकारले कम्तीमा हामीलाई श्रीलंकाको नियतिमा पु–याउने नै भए, त्योभन्दा अझखराब अवस्थामा पनि पु¥याउने त्रास बढेर गएको छ ।’ उनले समयमै जनता नजाग्ने, सरकारलाई गलत काम गर्न नरोक्ने र सुधारका कदम नचाल्ने हो भने नेपालीले कठोर आर्थिक मन्दीको सामना गर्नुपर्ने धारणा उनको थियो ।

‘सर्वोच्च अदालतले परमादेशबाट मलाई हटाएको मंगलबार एक वर्ष भयो, एमालेले निर्वाचनमा जाऔं, त्यही उत्तम विकल्प हुन्छ भनेको थियो जो आज पनि प्रमाणित भइरहेको छ, मुलुकमा विकृति बढेको छ, लोकतन्त्रका बाहक राजनीतिक दलको प्रभाव घटेको छ, आर्थिक मन्दीको अवस्था नजिकिएको छ’ उनले अर्को एक प्रसंगमा भने– प्रदेशमा जता हे¥यो त्यतै मन्त्रीका गाडी भेटिन्छन्, १४–१४ मन्त्रालय किन चाहियो, कसैलाई मन्त्री बनाउन मन्त्रालय खोल्ने, गठबन्धन जोगाउन र कसैलाई जागिर खुवाउन राज्यलाई आर्थिक बोझ थप्ने, ठेकेदारले काम सक्यो तर भुक्तानी पाउँदैन किनभने ढिकुटीमा पैसा छैन ।

गठबन्धन सरकारको मृत्यु भइसकेको र यसलाई महादेवले सतीदेवी बोकेझैं बोकेर हिँड्दा जनताको घरआँगनमा मृतदेहबाट अंग पतन भएर पीठ बन्दैन, बरु श्राव बन्छ भन्दै उनले मुलुकमा उत्पादन बढाउनका लागि चाहिने आधारभूत वस्तुको आयात गर्न पनि विदेशी मुद्रा नरहेको गम्भीर अवस्थाको चित्रण गरे ।तीन तहको सरकार मुलुकका लागि बोझ र विकृतिको स्रोत भएकाले यसलाई दुई तहमा ल्याउनुपर्छ कि भन्ने प्रश्नमा उहाँको जवाफ थियो, ‘नेपालको संविधान, २०७२ राष्ट्रिय एकता र अखण्डताका लागि हो, यसको पालना भएन भने विखण्डन, अनेकता र अशान्ति छाउँछ । हामीले अहिले इमानदार भएर तीन तहकै सरकारको अभ्यास गर्नुपर्छ । तर, इमानदारीका साथ संविधानले देखाएको बाटो हिँड्दाहिँड्दै पनि सम्भव भएन भने कुरा बेग्लै हो, जनताले नै अव्यावहारिक अभ्यास झिकेर फालिदिनेछन् ।’

संविधान निर्माणमा निर्णायक भूमिका निर्वाह गरेका नेता ओलीले संविधानले निर्दिष्ट गरेका ऐन–कानुन बनाएर संघीय लोकतान्त्रिक गणतन्त्रको अभ्यास नै नगरी, अभ्यासले पूर्णता पाउनुअघि नै हतारमा तीन तहको सरकार दुई तहमा ल्याउने विचार गलत हुने धारणा राखे । प्रतिनिधिसभाको सोमबारको बैठकमा एमालेका सांसद नवराज सिलवालले मुलुकको अर्थतन्त्र कमजोर भइरहेको अवस्थामा करोडौंको हतियार किन्ने योजना के कारणले अगाडि ल्याएको हो भनेर प्रश्न उठाएका छन् ।

‘गठबन्धनमा बसेका साथीहरूलाई पैसा चाहिएको छ । कमिसन चाहिएको छ । यो कमिसन र पैसाको लोभमा राष्ट्रको अर्थतन्त्र तहसनहस गर्ने योजना हो । राष्ट्र बैंकले दर्जनौं वस्तुमा आयात रोक लगाएको अवस्थामा फेरि अर्थतन्त्रलाई मारमा पार्ने गरिकन करोडौंको हतियार किन्ने योजना आउनु राष्ट्रघात हो । हतियारको कमिसन ३०० प्रतिशतसम्म कोटा बढाएर खरिद गर्नु धोका हो,’ सिलवालले भने, ‘गठबन्धन सरकार हतियार किन्ने निर्णयबाट फिर्ता होस् ।’

Leave a comment

Your email address will not be published.