संसदमा ‘शल्यक्रिया’ शब्दलाई ‘सलानकिरा’ भनेपछि नविना लामा भाइरल

नेकपा एमालेकी सांसद नविना लामाले प्रतिनिधिसभा बैठकमा बोलेको भिडियो क्लिप सामाजिक सञ्जालमा भाइरल भइरहेको छ । सामाजिक सञ्जाल प्रयोगकर्ताहरूले पूर्व विद्यार्थी नेता समेत रहेकी सांसद लामाले १ मिनेट बोलेको भिडियोमा तीन चार ठाउँमा शब्द चिप्लिएपछि मजाक उडाउँदै शेयर गरिरहेका छन् ।

खास भएको के थियो ?
बुधबार बसेको प्रतिनिधिसभा बैठकको शून्य समयमा सांसद लामाले स्वास्थ्य समस्या जस्तो गम्भीर विषय सदनमा उठाएकी थिइन् । उनले गंगालाल हृदय रोग अस्पतालमा अक्सीजेनेरेटरको अभावमा मुटुको शल्यक्रिया गर्ने काम रोकिएको विषय सदनमा उठाएकी थिइन् । तर कागज हेर्दै लिखित रुपमा आफ्नो धारणा राखेकी लामाले पटक पटक शल्यक्रियाको सहि उच्चारण गर्न सकिनन् । उनले लिखित रुपमा पढेको भाषण बच्चाले पाठ पढेको जस्तो देखिएको भन्दै सामाजिक सञ्जाल प्रयोगकर्ताले आलोचना गरेका छन् ।

उनले अक्सीजेनेरेटरको अभावमा मुटुको शल्यक्रिया रोकिएको छ भन्नुपर्नेमा अक्सीमिटरको अभावमा मुटुको सलानकिरा रोकिएको छ भन्न पुगेकी थिइन् । सामाजिक सञ्जालमा लामाले बोलेको भिडियो क्लिप राख्दै अनुराग साहले लेखेका छन्–‘अनेरास्ववियुको अध्यक्ष हुँदै संघीय सांसद बनेकी सांसद नविना लामाको यो अवस्था हेर्दा दया लाग्यो । लेखेको कुरा राम्रोसँग पढन नजान्ने हरुले देशको निति नियम चाहि कसरी राम्रो सँग लेख्लान् ?’

यस्तै इञ्जिनीयर राजदाश श्रेष्ठले लामाको भिडियो शेयर गर्दै लेखेका छन्–‘ धन्य हाम्रो सुन्दर भविष्य १११ हाम्रा ठुल्ठूला गौरवशाली राष्ट्रिय पार्टीका दोस्रा र तेस्रा पुस्ताका होनहार युवा नेताहरु जो भोली प्रधानमन्त्री र राष्ट्रपति बन्ने पर्खाईमा छन् ।’

सांसद लामाको प्रतिक्रिया : नेपाली टोनमा कमजोर छु, शब्द बिग्रिएकै हो

सांसद नविना लामाले १ मिनेटमा धेरै कुरा बोल्न हतार गरेका कारण र आफू नेपाली टोनमा कमजोर भएका कारण शब्दमा चिप्लिएको बताएकी छिन् । रातोपाटीसँग कुरा गर्दै सांसद लामाले भनिन्–‘अरुबेला पनि कहिलेकाँही मेरो शब्दमा मिस्टेक हुन्छ तर मैले उठाएको मुद्धा त सहि छ नी । मैले आफैले लेखेको कुरा हो, १ मिनेटभित्र सबै कुरा भनि सकाउनुपर्ने थियो, हतार गर्दा त्यस्तो भएको हो । १ मिनेटमा सबै कुरा छिटो भन्ने कला पनि सिकिएन । मेरो अरुबेला पनि केही शब्द बिग्रिन्छ किनभने म नेपाली टोनमा कमजोर पनि छु ।’

उनले आफूले शल्यक्रिया शब्द उच्चारण गर्दा बिग्रने गरेको बताउँदै सो शब्दको सट्टा अप्रेशन भनेको भए शुद्ध हुने थियो भन्ने कुरा उल्लेख गरिन् ।

Leave a comment

Your email address will not be published.